కార్మిక సంక్షేమం గాలికొదిలేసిన ప్రభుత్వాలు

          కేంద్రంలో బిజెపి, రాష్ట్రంలో టిడిపి ప్రభుత్వాలు కార్మికుల ఓట్లతో గెలిచి గద్దెనెక్కాయి. ఎన్నికల ముందు ఈ రెండు పార్టీల నాయ కులు అనేక హామీలు ప్రక టించి కార్మికులను నమ్మించారు. ఇప్పుడు కార్మికుల సమస్యలను విస్మరించి కార్పొరేట్‌ శక్తులకు ఊడిగం చేస్తు న్నారు. దశాబ్దాల తరబడి పోరాడి సాధించుకున్న కార్మిక హక్కులను కాలరాయడానికి రంగం సిద్ధం చేశారు. దేశంలోకి విదేశీ పెట్టుబడులు రావడానికి కార్మిక చట్టాలు ఇబ్బందిగా ఉన్నాయనే నెపంతో పెట్టుబడిదారుల లాభాల కోసం వాటిని సవరిస్తూ కేంద్ర ప్రభుత్వం నిర్ణయం తీసుకుంది. ''మేక్‌ ఇన్‌ ఇండియా'' పేరుతో విదేశీ కంపెనీలకు తలుపులు బార్లా తెరిచి దాసోహమంటున్నారు. కార్పొరేట్లు మన కార్మికశక్తిని దోచుకోవడానికి మరిన్ని అవకాశాలు కల్పిస్తున్నారు. ఈ విధానాల అమలును రాజస్థాన్‌, మధ్యప్రదేశ్‌లలో ప్రారంభిం చారు. నేనే మొదటి కార్మికుడిని అని చెప్పుకున్న చంద్రబాబు గుట్టుచప్పుడు కాకుండా శాసనసభలో కార్మికవ్యతిరేక చట్టాలను ఆమోదింపచేసుకుని కార్మిక వ్యతిరేకి అని నిరూపించుకున్నారు.
మహిళా సాధికారత మాటల్లోనే...
మహిళా సాధికారత గురించి మాట్లాడే పాలకులు మరో వైపు దానికి తూట్లు పొడుస్తున్నారు. దీనితో ఉద్యోగ భద్రత ప్రమాదంలో పడుతోంది. ప్రభుత్వ అనుమతి లేకుండానే పరిశ్రమలను మూసివేసేందుకు, లేఆఫ్‌ చేసేందుకు, కార్మికులను పని నుంచి తొలగించేందుకు యజమానులకు అధికారం కల్పించారు. పని గంటలు 8 నుంచి 12కు పెంచి నిర్బంధంగా పని చేయించుకుంటున్నా పట్టించుకునే నాథుడే లేడు. పని ప్రదేశాల్లో మౌలిక సదుపాయాలు లేక అనారో గ్యాలకు గురవుతున్నారు. శ్రమదోపిడి మరింత పెరిగి మహిళ లపై పనిభారం పెరిగిపోయి నానా అవస్థలు పడుతు న్నారు. మహిళా కార్మికులు కూడా రాత్రి షిఫ్ట్‌లలో పని చేయా లని సవరణ చేశారు. దీనితో మహిళలకు రక్షణ కరువైంది. మహిళా కార్మికుల పట్ల ప్రభుత్వాలకు చీమకుట్టినట్లు కూడా లేదు. పాలకుల ఉద్దేశంలో మహిళా సాధికారత అంటే అర్థం ఇదే కాబో లు? ప్రభుత్వ పథకాలలో రేయింబవళ్ళు పనిచేస్తున్న లక్షలాది మంది స్కీమ్‌ వర్కర్లను కూడా ప్రభుత్వం మోసం చేస్తోంది.
దీనావస్థలో అసంఘటిత కార్మికులు
కార్మికుల కష్టార్జితమైన పిఎఫ్‌, పెన్షన్‌ సొమ్మును షేర్‌ మార్కెట్లకు తరలిస్తున్నారు. ఆరోగ్య బీమా పథకం పేరుతో కార్మికులను మోసం చేయడానికి కుట్రలు పన్నుతున్నారు. అసంఘటిత కార్మికులకు సమగ్రచట్టం చేసి సామాజిక భద్రత కల్పించాల్సిన బాధ్యత నుంచి ప్రభుత్వం తప్పుకుంటోంది. అసంఘటిత కార్మికుల సంక్షేమానికి నిధులు కూడా కేటాయించడం లేదు. ప్రభుత్వాలు అనుసరిస్తున్న ప్రపంచ బ్యాంకు విధానాల వల్ల నిత్యావసర వస్తువుల ధరలు విపరీతంగా పెరిగిపోయాయి. పెట్రోల్‌, డీజిల్‌ ధరల మీద ప్రభుత్వ నియంత్రణ ఎత్తేశారు. రైల్వేఛార్జీలు పెంచారు. మళ్ళీ ఆర్‌టిసి ఛార్జీలు పెంచడానికి పూనుకుంటున్నారు. అధిక ధరలతో ప్రజలు అల్లాడిపోతున్నారు. 45వ ఇండియన్‌ లేబర్‌ కాన్ఫరెన్స్‌ ఏకగ్రీవంగా చేసిన ప్రతిపాదన ప్రకారం వీరందరికీ కనీస వేతనం, ఇతర సౌకర్యాలు కల్పించాలని పేర్కొన్నా ప్రభుత్వాలు పట్టించుకోవడం లేదు. ఎలాంటి చర్యలూ తీసుకోకపోగా పారితోషికాలు, ప్రోత్సాహకాలు, గౌరవ వేతనాల పేరుతో వెట్టచాకిరీ చేయించుకుంటున్నారు. వీరికి కనీస వేతనాలు పెంచాలని అడిగిన ప్రతి సందర్భంలోనూ అరెస్టులతో, నిర్బంధాలతో పోరాటాలను అణచివేస్తున్నారు. మరోవైపు కార్పొరేట్‌ కంపెనీలకు వేల కోట్ల రూపాయలు రాయితీలు కల్పిస్తున్నారు. అయినా పట్టుదలతో ప్రభుత్వ దమణకాండను ఎదుర్కొని మునిసిపల్‌, ఆర్టీసీ, అంగన్‌వాడీ కార్మికులు జీతాలు పెంచుకుని విజయం సాధించారు.
పోరాడి విజయం సాధించాలి
కేంద్రంలో మోడీ ప్రభుత్వం, రాష్ట్ర టిడిపి ప్రభుత్వం మొత్తం కార్మిక వర్గంపైనే దాడికి పూనుకుంటున్నాయి. యూనియన్‌ ఏర్పాటు చేసుకునే హక్కు హరిస్తూ, సమ్మె హక్కలను నిషేదించి యజమానుల దయాదాక్షిణ్యాలపై ఆధారపడి బ్రతికేలా చేస్తున్నాయి. కాబట్టి కార్మికవర్గం సమస్య లకు నిజమైన కారణం ప్రభుత్వం అనుసరించే విధానాలు తప్ప వేరే కాదు. ప్రజాసంక్షేమం కన్నా పెట్టుబడి దారుల లాభాలకే అధిక ప్రాధాన్యతనిచ్చే నయా ఉదారవాద విధానాలకు వ్యతిరే కంగా కార్మికవర్గం పోరాటం చేయాలి. కేంద్ర, రాష్ట్ర ప్రభుత్వాలు అనుసరిస్తున్న కార్మిక వ్యతిరేక విధానా లను తిప్పికొట్టాలి. కార్మిక చట్ట సవరణలను వ్యతిరేకరంగా కార్మికవర్గం ఏకతాటిపైకి రావాలి. ప్రభుత్వ రంగాన్ని నీరుగార్చే విదేశీ పెట్టుబడులపై ఆంక్షలు విధించాలి. దినదిన గండంగా బతుకుతున్న అసంఘ టిత కార్మికులకు సమగ్రచట్టం చేసి, కనీస వేతనం రూ.15 వేలు ఇవ్వాలని నినదించాలి. ఇటువంటి పోరాటాలను ఉదృం చేయాల్సిన అవసనం ఆసన్నమైంది. కార్మికులందరూ ఐక్యంగా సంపూర్ణశక్తితో కేంద్ర, రాష్ట్ర ప్రభుత్వాలపై ఒత్తిడి తేవాలి.
- ఎ. కమల
(వ్యాసకర్త సిఐటియు కృష్ణాజిల్లా కార్యదర్శి)